Ferilsskrá

Ég er fæddur á Barónsstíg 57, efstu hæð, 9. mars 1945. Foreldrar mínir voru Friðrik Guðjónsson (1897-1964) trésmiður og kona hans Sigríður Vigfúsdóttir (1908-1964). Faðir minn rak eigið rammaverkstæði lungann úr ævi sinni en fékkst jafnframt nokkuð við myndlist (Björn Th. Björnsson: Íslensk myndlist II, 183). Ég á tvær eldri systur: Sesselju röntgentækni sem Sigrúnu skrifstofumann.

Stundaði nám við Austurbæjarbarnaskólann en síðan Gagnfræðaskóla Vesturbæjar þaðan sem ég lauk landsprófi 1961. Síðan lá leiðin í Menntaskólann í Reykjavík og lauk ég stúdentsprófi úr stærðfræðideild 1965. Úr Háskóla Íslands lauk ég BA-prófi í íslensku og sagnfræði 1970 og stundaði um hríð framhaldsnám í sagnfræði en lauk ekki frekari prófum.

Á árunum 1970-1972 var ég kennari í Gagnfræðaskólanum í Laugalæk og síðan íslenskukennari í Menntaskólanum á Ísafirði 1972-1975. Í ársbyrjun 1976 réði ég mig sem blaðamann á Þjóðviljann og starfaði þar til 1985, þar af ritstjóri Sunnudagsblaðs Þjóðviljans um fjögurra ára skeið.

Árið 1985 hófst eiginlegur ferill minn sem fræðimaður og rithöfundur. Ég var þá ráðinn af borgaryfirvöldum í Reykjavík til að skrifa Sögu Reykjavíkur ásamt sagnfræðingunum Eggerti Þór Bernharðssyni og seinna Þorleifi Óskarssyni. Síðan hef ég eingöngu helgað mig ritstörfum. Eftir mig liggur fjöldi bóka og ritgerða (sjá annars staðar) og einnig hef ég starfað töluvert fyrir útvarp, sjónvarp og leikhús. Örlítið hef ég hlaupið í kennslu við Háskóla Íslands og verið leiðsögumaður í gönguferðum, einkum um gömlu Reykjavík og Kaupmannahöfn. Frá 2001 til 2015 starfaði ég í Reykjavíkurakademíunni.

Af félagsstörfum er það helst að segja að ég var í Stúdentaráði Háskóla Íslands 1966-67, menningarráði Ísafjarðar 1974-75, fyrstu stjórn Íbúasamtak Vesturbæjar 1977-78, í stjórn Torfusamtakanna 1985-2007, þar af formaður 1988-1996, í stjórn Minja og sögu 1988-2015, stjórn Minjaverndar 1997-2000 og stjórn Rithöfundasambands Íslands 1996-2002. Hef setið í menningarráði Hannesarholts frá 2012. Einnig hef ég verið í ýmsum ritnefndum. Ég var í ritnefnd Mímis, blaðs stúdenta í Íslenskum fræðum, Hljóðabungu, vestfirsks tímarits, 1975-1978. Ennfremur sat ég í ritnefnd bókarinnar Ísland á 20. öld eftir helga Skúla Kjartansson sem kom út 2002 og Aðalgeirsbókar, afmælisrits Aðalgeirs Kristjánssonar, sem kom út 2004.

Nokkrar helstu viðurkenningar:

Móðurmálsverðlaun úr Minningarsjóði Björns Jónssonar fyrir „góðan stíl og ljóðrænar mannlífsmyndir“ í Þjóðviljanum 1985, Íslensku bókmenntaverðlaunin 1991, 1997 og 2003. Ennfremur var ég tilnefndur til sömu verðlauna 1992, 1993 og 2005. Menningarverðlaun VISA-Ísland fyrir ritstörf 2000, verðlaun Jóns Sigurðssonar 2008 og riddarakross hinnar íslensku fálkaorðu 2015. Árum saman naut ég listamannalauna og hef einnig hlotið úthlutanir úr Vísindasjóði, sjóðnum Gjöf Jóns Sigurðssonar, Hagþenki, Letterstedtska sjóðnum, Dansk-islandsk fond, A.P. Møller og Hustru Chastine Mc-Kinney Møllers Fond til almene Formaal, Styrktarsjóði Baugs, Dronning Margrethes og Prins Henriks Fond og ýmsum öðrum menningarsjóðum.

Eiginkona mín er Hildur Kjartansdóttir framkvæmdastjóri, dóttir Kjartans Ragnars hæstaréttarlögmanns og sendifulltrúa og konu hans Ólafíu Þorgrímsdóttur. Sonur hennar og fóstursonur minn er Atli Knútsson (f. 1975) MBA, rekstrarráðgjafi. Kona hans er Elín Dóra Halldórsdóttir MBA viðskiptafræðingur og sálfræðingur og eru synir þeirra Halldór Andri (f. 2000) og Valur Björn (f. 2005)þ

Fyrri kona mín er Þuríður Elísabet Pétursdóttir. Dóttir mín með henni er Védís Guðjónsdóttir (f. 1967) fiskeldisfræðingur í Reykjavík, gift Ara Agnarssonar tónlistarkennara. Börn þeirra eru Eyrún (f. 1997), Egill (f. 1999) og Hrafn (f. 2002)

Dóttir mín með Ingiríði Hönnu Þorkelsdóttir er Úlfhildur Guðjónsdóttir (f. 1978) hjúkrunarfræðingur. Dóttir hennar er Kristín Hanna Hilmarsdóttir (f. 2010).